Be the
Pride

Eric anaamini kuwa anaweza kuelezewa kuwa ana roho na nguvu ya simba, kwa sababu ya uwajibikaji wake usiotetereka na kujitolea kwake katika fani ya kujenga mwili – alishinda mashindano ya Mr. Tanzania baada ya karibia miaka ishirini aliyotumia kuujenga mwili wake. Kwake yeye, simba sio tu muhimu kwa mazingira, ila ni chanzo cha kuhamasisha watu wawe na nguvu na msukumo wa mafanikio bora.

Dk. Kigwangalla ni daktari wa matibabu, mwandishi na mbunge wa Nzega tangu 2010. Alikuwa Makamu Waziri wa Afya tangu 2015 mpaka alipoteuliwa kwenye nafasi aliyomo sasa. Kama Waziri wa Maliasili na Utalii, ameongeza idadi ya Mbuga za Wanyama nchini toka 16 mpaka 21, ameanzisha kampeni ya “Pori Kwa Pori” kukabiliana na ukataji miti haramu kwenye hifadhi za misitu, na ameanzisha kampeni ya kuongeza utalii wa ndani.

Mohammed ni rais wa MeTL, kampuni ya Kiafrika inayojihusisha na viwanda mbalimbali na pia ni mmiliki wa Timu ya Mpira ya Simba. Mnamo mwaka 2016, Mohammed alitia saini Ahadi ya Kutoa (the Giving Pledge), ambayo ni ahadi ya kuchangia angalau nusu ya utajiri wake kwenda watu wasiojiweza. Nchini Tanzania, amechangia sekta mbalimbali kama vile elimu, afya na maendeleo ya jamii. Kama balozi wa WildAid amesaidia kupaza sauti kuhusu umuhimu wa uhifadhi wa wanyamapori.

Akiwa anajulikana kwenye medani ya uhifadhi wa simba, Dk. Kissui alianzisha Mradi wa Tarangire Lion kama mwanafunzi wa shahada ya uzamivu na anaendelea kuiendesha mpaka leo. Akiwa amefanya kazi kwa miaka mingi katika Mbuga ya Wanyama ya Serengeti ,Hifadhi ya Ngorongoro na hifadhi ya Tarangire, ana shauku sana na kuelewa sababu ya migogoro ya binadamu na simba na hufanya kazi kwa karibu na jamii za wafugaji kuwasaidia kupunguza mauaji ya simba kupitia hatua mbalimbali.

Hodari wa teknolojia aliyehitimu katika Chuo cha Stanford nchini Marekani, Benjamin ni kama shujaa wa vijana aliyeacha kazi nzuri kule Marekani na kurudi nyumbani Tanzania kuanzisha kampuni yake ya huduma za kifedha iitwayo NALA, ambayo imezawadiwa tuzo mbali mbali. Yeye sio tu mhamasishaji wa kutembelea Mbuga za Tanzania, ambaye ameleta karibia wageni 1000 tanzania, ila pia aliamua kuiita kampuni yake jina la simba jike kwa sababu ya mchango wa simba majike katika kutunza familia zao.

Neria ni mmoja wa maafisa migogoro wawili tu wafanyao kazi kwenye Mradi wa Ruaha Carnivore, kazi ambayo ina changamoto nyingi tu. Mara nyingi Neria huwa mtu wa kwanza kuitwa baada ya mnyama yeyote mla nyama-sio tu simba- akiwa ameshambulia ng’ombe kwenye jamii zilizo ukingoni mwa Mbuga ya Ruaha. Licha ya kuwepo kwa hali ngumu ambazo anatakiwa kutatua mara kwa mara, Neria anapenda kazi yake na amekuwa mtu anayeheshimika na mwenye mamlaka katika jamii yake kwa sababu ya kazi yake.

Mara nyingi akiitwa "hodari wa nyimbo za miondoko laini", Ben hutumia sauti yake ya kipekee sio tu kuimba nyimbo zinazopasua chati, ila pia hukemea biashara haramu ya wanyama pori na kuwaonyesha mamilioni ya mashabiki wake umuhimu wa kutembelea Mbuga za Tanzania. Akiwa balozi wa muda mrefu wa WildAid, Ben ametokea kwenye jumbe za video na filamu fupi kuhusu simba na tembo.

Samara mwenye umri wa miaka kumi amekuwa akiwapenda simba karibia maisha yake yote. Anakumbuka kumwona simba akitembea kwenye Bonde la Ngorongoro na kufikiria kuwa wana haki ya kuwa na uhuru wa kutembeatembea, kuvuta hewa safi na kuwa na familia zao. "Simba ni wanyama wa kifahari," anasema "na wa kipekee na ni viumbe vya Mungu" na anatumaini bado watakuwepo hata kwenye vizazi vya watoto na wajukuu wake.